دوروز کے دوران 51 ہزار سے زائد سیاحوں نے خیبر پختونخوا کا رخ کیا،ترجمان محکمہ سیاحت

پشاور:عید کے پہلے دوروزکے دوران51 ہزار سے زائد سیاحوں نے صوبہ خیبر پختونخوا کا رخ اختیار کیا، سب سے زیادہ وادی ناران میں 28 ہزار سیاحوں نے رخ کیا۔
ترجمان محکمہ سیاحت خیبر پختونخوا  محمد سعد کے مطابق عیدالفطر پرصوبےکے مختلف سیاحتی مقامات پر بڑی تعداد میں سیاح اُمڈ آئے، پہلے روز 10 ہزار سے زائد سیاحوں کی آمد ریکارڈ ہوئی، سب سے زیادہ وادی ناران میں دس ہزار 995، گلیات میں آٹھ ہزار سیاح آئے، وادی کمراٹ میں 1100 سیاحوں نے رخ کیا۔
ترجمان نے مزید بتایا کہ اگراسی طرح جائزہ لیں تو دو روز کے دوران خیبر پختونخوا میں آئے سیاحوں کی تعداد 51 ہزار سے تجاوز کرگئی، سب سے زیادہ وادی ناران میں 28 ہزار 112، گلیات میں 17ہزار سیاح آئے، وادی کمراٹ میں 31سو سیاحوں نے رخ کیا۔
ترجمان کے مطابق ٹورازم پولیس کے اہلکار مختلف سیاحتی مقامات پر ڈیوٹی سرانجام دے رہے ہیں، ٹورازم ہیلپ لائن 1422 چوبیس گھنٹے بحال ہے۔