سپریم لیڈر آیت اللہ خامنہ ای کی اہلیہ بھی زخموں کی تاب نہ لاتے ہوئے چل بسیں

تہران: گزشتہ روز اسرائیلی و امریکی فضائی حملے میں شہید ہونے والے ایرانی سپریم لیڈر آیت اللہ علی خامنہ ای کی اہلیہ بھی زخموں کی تاب نہ لاتے ہوئے انتقال کر گئی ہیں۔

تفصیلات کے مطابق ایرانی خبر رساں ایجنسی ’تسنیم‘ نے رپورٹ کیا کہ وہ اسی مشترکہ امریکی اور اسرائیلی حملے میں زخمی ہوئی تھیں جس میں آیت اللہ علی خامنہ ای شہید ہوئے تھے۔

ایرانی میڈیا رپورٹس کے مطابق 86 سالہ آیت اللہ علی خامنہ ای اتوار کی صبح امریکا اور اسرائیل کے مشترکہ فضائی حملوں میں شہید ہو گئے تھے۔

جبکہ ایرانی خبر رساں ایجنسی فارس کے مطابق ان حملوں میں سپریم لیڈر کے بیٹے، بیٹی، داماد، بہو اور نواسے بھی مارے گئے ہیں۔

خیال رہے کہ سپریم لیڈرآیت اللہ علی خامنہ ای کئی دہائیوں تک ایران کے سب سے طاقتور رہنما رہے۔ انہوں نے ایران میں مذہبی نظام حکومت کو مضبوط کیا اور ملک کو خطے کی ایک اہم طاقت بنانے کی کوشش کی،ان کے دور میں ایران کا جوہری پروگرام عالمی توجہ کا مرکز بنا رہا اور اسی معاملے پر اسرائیل اور امریکا کے ساتھ کشیدگی میں اضافہ ہوا۔