190 ملین پاؤنڈ کیس: بانی پی ٹی آئی اور اہلیہ کی سزا معطلی کی درخواستوں پر فریقین کو نوٹس

اسلام آباد ہائیکورٹ نے 190 ملین پاؤنڈ کیس میں پاکستان تحریک انصاف (پی ٹی آئی) کے بانی چیئرمین اور ان کی اہلیہ بشریٰ بی بی کی سزا معطلی کی درخواستوں پر فریقین کو نوٹس جاری کردیے۔
تفصیلات کے مطابق  اسلام آباد ہائیکورٹ کے قائم مقام چیف جسٹس سرفراز ڈوگر اور جسٹس محمد آصف نے 190 ملین پاؤنڈ کیس میں بانی پی ٹی آئی اوراہلیہ بشریٰ بی بی کی سزا معطلی کی درخواستوں پر سماعت کی۔
دوران سماعت درخواست گزاروں کی جانب سے سردارلطیف کھوسہ ایڈوکیٹ عدالت میں پیش ہوئے اور کیس آئندہ بدھ کو دوبارہ سماعت کے لیے مقررکرنے کی استدعا کی۔
عدالت نے نیب سمیت فریقین کو نوٹس جاری کرتے ہوئے جواب طلب کرتے ہوئے سزا معطلی کی درخواستیں آئندہ ہفتے سماعت کے لیے مقرر کرنے کی ہدایت کردی اور کیس کی سماعت آئندہ ہفتے کے لیے ملتوی کر دی۔
خیال رہے کہ بانی پی ٹی آئی اور بشری بی بی نے 190 ملین پاؤنڈ کیس میں سزا معطلی کی درخواستیں دائر کی تھیں، رجسٹرار آفس نے رپورٹ دی تھی کہ بانی پی ٹی آئی کی اپیل اس سال مقرر ہونے کا امکان نہیں۔
واضح رہے کہ احتساب عدالت نے بانی پی ٹی آئی کو 14 جبکہ بشریٰ بی بی کو 7 سال کی سزا سنا رکھی ہے۔