مسافروں کے لیے اچھی خبر،ریلوے اسٹیشنز پر وائی فائی کی سہولت فراہم کرنے کا فیصلہ

لاہور:مسافروں کے لیے اچھی خبر،پاکستان ریلوے نے ملک کے تمام بڑے ریلوے اسٹیشنز پر مسافروں کے لیے وائی فائی کی سہولت فراہم کرنے کا فیصلہ کر لیا۔
تفصیلات کے مطابق وفاقی وزیرریلوے حنیف عباسی اور پی آئی ٹی بی کے چئیرمین کی ملاقات ہوئی جس میں وائی فائی کی سہولیات کے حوالے سے مذاکرات ہوئے،جبکہ ریلوے ملازمین کی حاضری بائیو میٹرک ہوگی، ریلوے کے تمام شعبوں کو ڈیجیٹل لائزیشن کی طرف لے جایا جائے گا۔

 وزیر ریلوے محمد حنیف عباسی نے لاہور ریلوے اسٹیشن کا اچانک دورہ کرتے ہوئے صفائی ستھرائی کا معیار اور کھانے کی کوالٹی چیک کی،انہوں نے ویٹنگ ایریا اور بزنس لاؤنج کو 60 دن میں مکمل اَپ گریڈ کرنے کی ہدایت کی اور کہا کہ ویٹنگ ایریا میں اے سی لگانے کا کام جلد نمٹایا جائے۔
دورے کے دوران ڈویژنل سپرنٹنڈنٹ ریلوے لاہور میاںطارق لطیف نے وفاقی وزیر کو اسٹیشن کی تزئین و آرائش سمیت دیگر تعمیراتی کاموں سے متعلق بریفنگ دی۔ اس موقع پر آئی جی ریلوے اور دیگر سینئر افسران بھی موجود تھے۔
وزیر ریلوے نے لاہور ریلوے اسٹیشن کے پلیٹ فارم ایسکیلیٹر لگانے کی پیش رفت کا جائزہ بھی لیا۔ 
وفاقی وزیر کا مزیدکہنا تھا کہ رابطہ ایپلی کیشن کو آسان بنایا جائے گا۔