دریائے سندھ میں کشتی الٹ گئی، 7 افراد کو بچا لیا گیا، 2 لاپتا

کوہاٹ:دریائے سندھ میں کوہاٹ کے قریب کشتی الٹ گئی، 7 افراد کو بچالیا گیا جبکہ 2 افراد لاپتا ہیں جن کی تلاش جاری ہے۔
ریسکیو 1122 حکام کے مطابق بدھ کو کوہاٹ کے قریب دریائے سندھ میں کشتی الٹنے سے اس میں سوار مسافر ڈوب گئے جن میں سے سات افراد کو بچا لیا گیا جبکہ دو لاپتا ہو گئے۔
  ریسکیو 1122 کے مطابق کشتی میں نو افراد سوار تھے، اطلاع ملتے ہی ریسکیو ٹیمیں فوری طور پر جائے وقوعہ پر پہنچ گئیں اور غوطہ خوروں کی مدد سے ریسکیو آپریشن شروع کر دیا گیا۔
 ریسکیو ذرائع کے مطابق اس سرچ آپریشن میں کوہاٹ، نوشہرہ اور کرک سے تعلق رکھنے والی امدادی ٹیمیں حصہ لے رہی ہیں جبکہ ریسکیو آپریشن کی نگرانی ڈسٹرکٹ ایمرجنسی آفیسر کوہاٹ، عارف خٹک خود کر رہے ہیں۔ 
حکام کا کہنا ہے کہ امدادی کام تیزی سے جاری ہے اور لاپتہ افراد کو ڈھونڈنے کیلئے تمام ممکنہ وسائل بروئے کار لائے جا رہے ہیں۔
خیال رہے کہ گزشتہ سال اپریل میں بھی نوشہرہ ضلع میں کنڈ پارک کے قریب دریائے سندھ میں کشتی الٹنے سے 8 افراد ڈوب گئے تھے۔