وزارت داخلہ کا زائدالمیعاد شناختی کارڈز پر جاری تمام سمز فوری طور پر بلاک کرنے کا فیصلہ

وزارت داخلہ نے زائدالمیعاد شناختی کارڈز پر جاری تمام سمز فوری طور پر بلاک کرنے کا فیصلہ کر لیا۔

وفاقی وزیر داخلہ محسن نقوی کی زیر صدارت اہم اجلاس ہوا، جس میں زائدالمیعاد شناختی کارڈز پر جاری تمام موبائل سمز کو فوری طور پر بلاک کرنے کا فیصلہ کیا گیا۔ یہ اقدام شہریوں کے کوائف کے درست اندراج اور سکیورٹی معاملات کو یقینی بنانے کے لیے کیا گیا ہے۔

پہلے مرحلے میں 2017 یا اس سے پہلے کے شناختی کارڈزپرجاری سمزبند کی جائیں گی۔ وزیر داخلہ محسن نقوی نے ملک بھرمیں چہرہ شناسی تکنیک کا نفاذ بھی 31 دسمبر2025 تک یقینی بنانے کی ہدایت کیں۔ اجلاس میں وفاقی وزیرداخلہ نے ملتان، سکھر اور گوادر میں نادرا کے ریجنل دفاتر کے قیام کی منظوری بھی دی۔

اجلاس کے بعد وزیر داخلہ محسن نقوی اور سابق وزیر مملکت طلال چوہدری نے اسلام آباد کے سیکٹر آئی-8 میں 10 منزلہ نادرا میگا سینٹر کا سنگ بنیاد بھی رکھ دیا۔ یہ جدید ترین میگا سینٹر شہریوں کو شناختی کارڈ، بائیومیٹرک تصدیق، اور دیگر نادرا سہولیات ایک ہی چھت تلے فراہم کرے گا۔

نادرا حکام کے مطابق یہ میگا سینٹر جون 2026 تک مکمل کر لیا جائے گا۔ منصوبے کی تکمیل سے اسلام آباد اور گرد و نواح کے لاکھوں شہریوں کو سہولت میسر آئے گی، اور نادرا دفاتر پر موجودہ دباؤ میں نمایاں کمی آئے گی۔

وزیر داخلہ نے اس موقع پر کہا کہ حکومت شہریوں کو سہولیات کی فراہمی کے ساتھ ساتھ ڈیجیٹل نظام کو مزید مؤثر اور محفوظ بنانے کے لیے پرعزم ہے۔