ہم دشمن کو چھپ کے نہیں للکار کر مارتے ہیں، چیف آف ڈیفینس فورسز عاصم منیر

اسلام آباد: چیف آف آرمی اسٹاف اور چیف آف ڈیفینس فورسز فیلڈ مارشل سید عاصم منیر نے کہا ہے کہ ریاستِ طیبہ اور ریاستِ پاکستان کے درمیان ایک گہرا تعلق ہے، اور دفاعی معاہدہ ہماری تاریخ کا اہم حصہ ہے۔

فیلڈ مارشل سید عاصم منیرنے قومی علماء مشائخ کانفرنس سے خطاب کرتے ہوئے کہا کہ اللہ تعالیٰ نے تمام مسلم ممالک میں سے محافظینِ حرمین کا شرف پاکستان کو عطا کیا ہے، جو ہماری ذمہ داری اور عزت ہے۔

فیلڈ مارشل نے قوم کو علم اور قلم کے فروغ پر زور دیتے ہوئے کہا کہ جس قوم نے علم کو چھوڑ دیا، وہاں انتشار اور فساد الارض نے جگہ لے لی۔

انہوں نے واضح کیا کہ عزت اور طاقت تقسیم سے نہیں بلکہ محنت اور علم سے حاصل ہوتی ہے  دہشتگردی پاکستان کا نہیں بلکہ ہندوستان کا وطیرہ ہے اور ہم دشمن کو چھپ کے نہیں بلکہ للکار کر مارتے ہیں۔

انہوں نے کہا کہ اسلامی ریاست میں ریاست کے علاوہ کوئی جہاد کا حکم نہیں دے سکتا اور معرکہ حق میں اللہ کی نصرت سے کامیابی ملی۔

فیلڈ مارشل نے علماء کو مخاطب کرتے ہوئے کہا کہ قوم کو متحد رکھیں اورعوام کی نظر میں وسعت پیدا کریں تاکہ پاکستان میں امن، ترقی اور تعلیم کا فروغ ممکن ہو۔

کانفرنس میں فوج کے موقف، اسلامی تعلیمات اور قومی ترقی میں علماء کے کردار پر زور دیا گیا، اور فیلڈ مارشل نے تاکید کی کہ پاکستان کی سلامتی، وحدت اور اسلامی اقدار کو برقرار رکھنا ہر شہری کی ذمہ داری ہے۔