سیکیورٹی فورسز کی پشاور اور شمالی وزیر ستان میں کارروائیاں،5 خارجی دہشت گرد ہلاک

راولپنڈی :سیکیورٹی فورسز نےخیبر پختونخوا کے مختلف مقامات میں کامیاب کارروائیاں کرتے ہوئے5 خارجی دہشت گردوں کو جہنم واصل کر دیا۔

 پاک فوج کے شعبہ تعلقات عامہ (آئی ایس پی آر) کے مطابق یہ کارروائیاں پشاور اور شمالی وزیرستان میں انٹیلی جنس بنیادوں پر کی گئیں۔

ترجمان آئی ایس پی آر کے مطابق پشاور میں ہونے والی کارروائی میں چار دہشت گرد ہلاک کیے گئے جن میں خارجی حارث اور بصیر بھی شامل ہیں۔ 

ترجمان نے مزید بتایا کہ دوسری کارروائی شمالی وزیرستان میں کی گئی، جہاں ایک دہشت گرد کو فائرنگ کے تبادلے میں ہلاک کر دیا گیا۔

ترجمان پاک فوج کا کہنا ہے کہ آپریشن کے دوران ہلاک ہونے والے دہشت گردوں کے قبضے سے بھاری مقدار میں اسلحہ، گولیاں اور دھماکہ خیز مواد بھی برآمد کیا گیا۔

آئی ایس پی آر کے مطابق یہ تمام دہشت گرد ملک میں بھارتی اسپانسرڈ دہشت گردی میں ملوث تھے۔

 ترجمان نے واضح کیا کہ سیکیورٹی فورسز ملک دشمن عناصر کے مکمل خاتمے کے لیے پرعزم ہیں اور عوام کے تعاون سے ملک میں دیرپا امن یقینی بنایا جائے گا۔