کوئٹہ: مسلح ملزمان کی گاڑی پر فائرنگ سے 2 افراد جاں بحق

کوئٹہ: بلوچستان کے دارلاحکومت کوئٹہ میں نامعلوم مسلح ملزمان نے گاڑی پر فائرنگ کردی، جس کے نتیجے میں 2 افراد جاں بحق ہوگئے۔

پولیس کے مطابق اتوار کی شب کوئٹہ کے سریاب روڈ پر مقامی پیٹرول پمپ کے قریب نامعلوم مُسلح موٹر سائیکل سوار ملزمان نے ایک گاڑی پر فائرنگ کی، جس کے نتیجے میں گاڑی میں سوار 2 افراد موقع پر ہی جان کی بازی ہار گئے جبکہ فائرنگ کے بعد ملزمان فرار ہونے میں کامیاب ہوگئے۔

پولیس کے مطابق مقتولین کی شناخت لعل خان اور حبیب اللہ کے ناموں سے ہوئیں،جن کی لاشوں کو قانونی کارروائی کے لیے اسپتال منتقل کردیاگیا ہے۔

پولیس کے مطابق فوری طور پر قتل کی وجوہات معلوم نہ ہو سکی جبکہ متعلقہ پولیس تھانہ اس سلسلے میں مزید تحقیقات کر رہی ہے۔