لکی مروت میں نامعلوم مسلح افراد کی فائرنگ ،2 ٹریفک پولیس اہلکار شہید

لکی مروت : صوبہ خیبر پختونخوا کے ضلع لکی مروت میں نامعلوم افراد کی فائرنگ سے 2 ٹریفک پولیس اہلکار شہید ہوگئے۔

تفصیلات کے مطابق لکی مروت میں ڈیوٹی کیلئے جانے والے 2 ٹریفک پولیس اہلکار پر نامعلوم افراد نے فائرنگ کردی جس سے دونوں دم توڑ گئے جب کہ  نامعلوم افراد پولیس اہلکاروں کا اسلحہ بھی ساتھ لے گئے۔

لکی مروت پولیس کے مطابق واقعہ کی تحقیق کی جارہی ہے ملزمان کو جلد از جلد گرفتار کر لیا جائے گا۔

دوسری جانب وزیر اعلیٰ خیبرپختونخوا علی امین گنڈاپور نے واقعے کی مذمت کرتے ہوئے کہا کہ شہدا کے اہل خانہ کو تنہا نہیں چھوڑا جائے گا۔

وفاقی وزیر داخلہ محسن نقوی نے کہا کہ خیبرپختونخوا پولیس کے بہادر سپوتوں کو سلام پیش کرتے ہیں، شہدا کی لازوال قربانیوں کو ہمیشہ یاد رکھا جائے گا۔