(ن) لیگ میں شمولیت پر پی ٹی آئی کا 4 منحرف ارکان کے خلاف نااہلی ریفرنس دائر کرنے کا فیصلہ

پاکستان تحریک انصاف نے اپنی حمایت یافتہ قومی اسمبلی کے چار ارکان کی پاکستان مسلم لیگ (ن) میں شمولیت پر اہم قدم اٹھانے کا فیصلہ کرلیا ہے۔

ذرائع کے مطابق 26 ویں آئینی ترمیم کے موقع پر ان چاروں ارکان نے پارٹی مؤقف سے اختلاف کرتے ہوئے ترمیم کے حق میں ووٹ دیا تھا۔ اب پی ٹی آئی نے ان منحرف اراکین کے خلاف اسپیکر قومی اسمبلی کو ریفرنس بھیجنے کا فیصلہ کیا ہے۔

پی ٹی آئی کے سینئر رہنما اسد قیصر کے مطابق جن چار ارکان کے خلاف کارروائی کا فیصلہ کیا گیا ہے ان میں چوہدری عثمان علی، مبارک زیب، اورنگزیب کھچی اور ظہور قریشی شامل ہیں، جنہوں نے ترمیم کے حق میں ووٹ دیا۔

اسد قیصر کا کہنا تھا کہ یہ تمام اراکین تحریک انصاف کے ٹکٹ پر منتخب ہوئے تھے، اور پارٹی کو ان کے خلاف نااہلی کے لیے اسپیکر اور الیکشن کمیشن کو ریفرنس بھیجنے کی سفارش کی ہے۔ اب دیکھنا یہ ہے کہ متعلقہ ادارے اس پر کیا قدم اٹھاتے ہیں۔