عاشورہ محرم پر 5 اور 6 جولائی کو عام تعطیل، ملک بھر میں فوج تعینات کرنے کا فیصلہ

وفاقی حکومت نے محرم الحرام کے موقع پر 5 اور 6 جولائی (9 اور 10 محرم) کو عام تعطیل کا اعلان کر دیا ہے۔

کابینہ ڈویژن کی جانب سے جاری کردہ نوٹیفکیشن کے مطابق عاشورہ کے دونوں ایام یعنی 9 اور 10 محرم الحرام کو تمام سرکاری دفاتر بند رہیں گے۔

محرم کے دوران سیکیورٹی خدشات کے پیش نظر وزارت داخلہ نے ملک بھر میں پاک فوج کی تعیناتی کا بھی فیصلہ کیا ہے تاکہ مجالس اور جلوسوں کے دوران امن و امان برقرار رکھا جا سکے۔

وزارت داخلہ کے اعلامیے کے مطابق چاروں صوبوں، گلگت بلتستان، آزاد کشمیر اور وفاقی دارالحکومت اسلام آباد میں فوجی دستے سیکیورٹی فرائض انجام دیں گے۔ یہ اقدام صوبائی حکومتوں اور متعلقہ اداروں کی درخواست پر کیا گیا ہے، جنہوں نے مخصوص حساس علاقوں میں اضافی سیکیورٹی کی ضرورت پر زور دیا تھا۔

فوج کی تعیناتی آئین کے آرٹیکل 245 کے تحت کی گئی ہے، جس کے تحت مسلح افواج سول انتظامیہ کی معاونت کے لیے کام کر سکتی ہیں۔ تعینات فوجی اہلکار پولیس اور رینجرز کے ساتھ مل کر مشترکہ گشت، چیکنگ اور سیکیورٹی نگرانی کے فرائض انجام دیں گے۔