وزیر اعظم کا حالیہ تنازع پر آذربائیجان کی مستقل حمایت پر صدر الہام علیوف کا شکریہ

وزیراعظم شہباز شریف اور آذربائیجان کے صدر الہام علیوف کے درمیان اقتصادی تعاون تنظیم (ECO) کے سربراہی اجلاس کے موقع پر اہم ملاقات ہوئی۔

ملاقات میں وزیراعظم شہباز شریف نے بھارت کے ساتھ حالیہ تنازع پر آذربائیجان کی مستقل حمایت پر صدر الہام علیوف کا شکریہ ادا کیا۔ انہوں نے کہا کہ پاکستان نے بھی ہر مشکل گھڑی میں آذربائیجان کا ساتھ دیا ہے اور دونوں ممالک نے ہمیشہ ایک دوسرے کے ساتھ یکجہتی کا مظاہرہ کیا ہے۔

دونوں رہنماؤں نے سرمایہ کاری اور تجارتی تعاون سے متعلق جاری پیشرفت پر اطمینان کا اظہار کیا۔ ملاقات کے دوران اس بات پر زور دیا گیا کہ تجارت، توانائی، اور دیگر معاشی شعبوں میں دوطرفہ تعاون کو مزید فروغ دیا جائے گا۔

صدر الہام علیوف نے پاکستان میں سرمایہ کاری کو مزید وسعت دینے کے عزم کا اعادہ کیا، جب کہ وزیراعظم شہباز شریف نے کہا کہ دونوں ممالک کی قیادت کے درمیان حالیہ روابط باہمی تعلقات کو مزید مستحکم بنانے میں مددگار ثابت ہو رہے ہیں۔

ملاقات کو باہمی مفادات کے لیے اہم پیش رفت قرار دیا جا رہا ہے، جس سے دونوں ممالک کے تعلقات میں نئے امکانات پیدا ہوں گے۔