عمران خان نے 10 محرم کے بعد تحریک شروع کرنے کی ہدایت دی ہے، علیمہ خان

پاکستان تحریک انصاف (پی ٹی آئی) کے بانی عمران خان کی بہن علیمہ خان نے انکشاف کیا ہے کہ عمران خان نے 10 محرم الحرام کے بعد نئی سیاسی تحریک کے آغاز کی ہدایت دے دی ہے۔ وہ راولپنڈی کی انسداد دہشت گردی عدالت کے باہر میڈیا سے گفتگو کر رہی تھیں۔

علیمہ خان کے مطابق، عمران خان نے پیغام دیا ہے کہ "27ویں آئینی ترمیم کے بجائے ملک میں بادشاہت نافذ کر دی گئی ہے۔" ان کے بقول عمران خان کا مؤقف ہے کہ موجودہ نظام عوام کو غلامی سے نجات نہیں دلا سکتا، اور اگر یہی حالات برقرار رہے تو "جیل ہی بہتر ہے۔"

انہوں نے عمران خان کی جیل میں موجودہ حالت پر بھی شدید تشویش کا اظہار کیا اور دعویٰ کیا کہ سابق وزیر اعظم روزانہ 22 گھنٹے سیل میں بند رہتے ہیں اور انہیں صرف دو گھنٹے باہر آنے کی اجازت ملتی ہے۔ ان کے مطابق عمران خان کو نہ کتابیں دی جا رہی ہیں، نہ بچوں سے بات کرنے کی اجازت ہے، اور تمام بنیادی سہولیات واپس لے لی گئی ہیں۔

علیمہ خان نے سابق وزیر اعظم نواز شریف اور مریم نواز کی جیل سہولیات کا حوالہ دیتے ہوئے کہا کہ انہیں ریسٹ ہاؤس میں رکھا گیا تھا، جہاں کھانے گھر سے آتے تھے اور سینکڑوں افراد ان سے ملاقات کر سکتے تھے۔

انہوں نے کہا کہ عمران خان کی واضح ہدایت پر 10 محرم کے بعد تحریک انصاف اپنی سیاسی تحریک کا باقاعدہ آغاز کرے گی، جس کے لیے پارٹی کی سطح پر منصوبہ بندی مکمل کر لی گئی ہے۔