ایران کی حمایت پر پاکستان کا شکریہ ادا کرتے ہیں ، ر صدر پزشکیان

یران کے صدر مسعود پزشکیان نے آذربائیجان میں وزیراعظم شہباز شریف سے ملاقات کے دوران حالیہ بحران میں ایران کی حمایت پر حکومتِ پاکستان کا شکریہ ادا کیا۔

یہ ملاقات اقتصادی تعاون تنظیم (ECO) کے سربراہی اجلاس کے موقع پر کاراباخ کے شہر خان کندی میں ہوئی۔ اس موقع پر دونوں رہنماؤں نے اسرائیل کی ایران مخالف کارروائیوں کے تناظر میں خطے کی بدلتی ہوئی صورتحال پر تبادلہ خیال کیا۔

وزیراعظم شہباز شریف نے ایران کے عوام اور قیادت کے ساتھ پاکستان کی غیرمتزلزل یکجہتی کا اعادہ کیا اور خطے میں امن و استحکام کے لیے بات چیت اور سفارتکاری کو ناگزیر قرار دیا۔ انہوں نے ایرانی سپریم لیڈر کے لیے مبارکباد اور نیک تمناؤں کا پیغام بھی پہنچایا۔

صدر پزشکیان نے ایک بار پھر پاکستان کی جانب سے ایران کے لیے حالیہ بحران کے دوران کی گئی مؤثر سفارتی حمایت کو سراہا اور اس پر اظہارِ تشکر کیا۔

اسی دوران وزیراعظم شہباز شریف نے آذربائیجان کے صدر الہام علییوف سے بھی ملاقات کی، جہاں انہوں نے بھارت کے ساتھ حالیہ کشیدگی میں آذربائیجان کی مسلسل حمایت پر ان کا شکریہ ادا کیا۔

وزیراعظم کا کہنا تھا کہ دونوں ممالک کی قیادت کے درمیان حالیہ روابط سے باہمی تعلقات کو مزید وسعت اور استحکام حاصل ہوگا۔