بھارت پاکستان مخالف بیانیے کو عالمی سطح پر معمول بنا رہا ہے: بلاول بھٹو

چیئرمین پیپلز پارٹی بلاول بھٹو زرداری نے کہا ہے کہ بھارت اپنے پاکستان مخالف نظریے کو دنیا کے لیے ایک "نارمل" مؤقف کے طور پر پیش کر رہا ہے، جو نہ صرف پاکستان بلکہ خود بھارت کے عوام کے لیے بھی خطرناک ثابت ہو سکتا ہے۔

غیر ملکی میڈیا سے گفتگو کرتے ہوئے بلاول بھٹو نے کہا کہ دہشت گردی کے سب سے زیادہ واقعات پاکستان میں پیش آئے ہیں، اور پاکستان نے ان دہشت گرد عناصر کے خلاف بھرپور کارروائیاں کی ہیں۔

انہوں نے بتایا کہ پاکستان فنانشل ایکشن ٹاسک فورس (FATF) کے تمام مراحل کامیابی سے طے کر چکا ہے اور FATF نے پاکستان کی انسدادِ دہشت گردی کی کوششوں کو سراہا ہے۔

بلاول بھٹو نے واضح کیا کہ بھارت میں پیش آنے والے دہشت گرد حملوں میں پاکستان کا کوئی ہاتھ نہیں، بلکہ پاکستان خود روزانہ کی بنیاد پر دہشت گردی کا نشانہ بنتا ہے۔

پہلگام حملے کے حوالے سے بات کرتے ہوئے بلاول بھٹو زرداری نے کہا کہ بھارت نہ تو پاکستان کو اور نہ ہی عالمی برادری کو اس واقعے سے متعلق کوئی ٹھوس شواہد فراہم کر سکا ہے، بلکہ اپنے عوام سے بھی حقائق کو چھپایا گیا۔