لاہور سے اسکردو جانے والی پرواز کو پرندہ ٹکرانے پر واپس لینڈ کرایا گیا، پرواز منسوخ

لاہور سے اسکردو جانے والی ایک نجی ائیرلائن کی پرواز کو پرندہ ٹکرانے کے واقعے کے بعد واپس لاہور ایئرپورٹ پر لینڈ کرنا پڑا۔

ائیرلائن کے ترجمان کے مطابق، پرواز پی اے 481 کو لاہور سے روانگی کے فوری بعد برڈ اسٹرائیک کا سامنا کرنا پڑا۔ احتیاطی تدابیر کے تحت طیارے کو فوری طور پر واپس لاہور ایئرپورٹ پر اتار لیا گیا۔

ترجمان نے بتایا کہ طیارے میں سوار 149 مسافروں کو آف لوڈ کر دیا گیا ہے، جبکہ پرواز پی اے 481 کو منسوخ کر دیا گیا ہے۔ اس کے ساتھ ساتھ اسکردو سے لاہور آنے والی پرواز بھی منسوخ کر دی گئی ہے۔

ذرائع کے مطابق، پرندہ ٹکرانے سے طیارے کے انجن نمبر 2 کے دو بلیڈ متاثر ہوئے ہیں، جس کی مرمت کے بعد ہی طیارہ دوبارہ پرواز کے قابل ہوگا۔