پی ٹی آئی پارلیمنٹرینز نے خیبرپختونخوا میں مخصوص نشستوں کیلئے اسلام آباد ہائیکورٹ سے رجوع کر لیا

اسلام آباد: پاکستان تحریک انصاف پارلیمنٹرینز (پی ٹی آئی پی) نے خیبرپختونخوا میں اپنے حصے کے مطابق مخصوص نشستیں نہ ملنے پر الیکشن کمیشن کے فیصلے کو اسلام آباد ہائیکورٹ میں چیلنج کر دیا ہے۔

پی ٹی آئی پارلیمنٹرینز کی جانب سے دائر کردہ درخواست میں الیکشن کمیشن کا 5 اپریل کا نوٹیفکیشن چیلنج کیا گیا ہے، جس میں عدالت سے استدعا کی گئی ہے کہ 4 مارچ کے نوٹیفکیشن کو درست کرنے کا حکم دیا جائے اور خیبرپختونخوا اسمبلی میں مخصوص نشستیں پارلیمانی جماعت کے تناسب سے الاٹ کی جائیں۔

درخواست پر سماعت اسلام آباد ہائیکورٹ کے جسٹس انعام امین منہاس کل کریں گے۔

یاد رہے کہ 27 جون کو سپریم کورٹ کے 7 رکنی اکثریتی بینچ نے مخصوص نشستوں سے متعلق نظرثانی درخواستیں منظور کرتے ہوئے 12 جولائی 2023 کے عدالتی فیصلے کو کالعدم قرار دیا تھا۔
سپریم کورٹ نے سنی اتحاد کونسل کو مخصوص نشستیں دینے سے متعلق پشاور ہائیکورٹ کا فیصلہ برقرار رکھا تھا۔

سپریم کورٹ کے فیصلے کے بعد الیکشن کمیشن آف پاکستان نے 74 مخصوص نشستیں بحال کر دیں، جن کے مطابق:

قومی اسمبلی میں (ن) لیگ کو 13، پیپلز پارٹی کو 4، جے یو آئی کو 2 مخصوص نشستیں دی گئیں۔

خیبرپختونخوا اسمبلی میں 25 مخصوص نشستیں بحال ہوئیں، جن میں:

جے یو آئی کو 10 ، ن لیگ کو 7 ، پیپلز پارٹی کو 6 پی ٹی آئی پی اور اے این پی کو 1،1 نشست دی گئی۔

پی ٹی آئی پی کا موقف ہے کہ انہیں خیبرپختونخوا اسمبلی میں ان کے عددی حجم کے مطابق نشستیں نہیں دی گئیں، لہٰذا عدالت اس کی اصلاح کرے۔