حج 2026 کے لیے دو لاکھ سے زائد پاکستانیوں نے رجسٹریشن مکمل کر لی

آئندہ سال حج 2026 کے لیے اب تک دو لاکھ سے زائد پاکستانی شہری رجسٹریشن مکمل کر چکے ہیں۔ وزارتِ مذہبی امور کے ترجمان کے مطابق، رجسٹریشن کی آخری تاریخ آج ہے اور خواہش مند افراد گھر بیٹھے آن لائن رجسٹریشن کی سہولت سے فائدہ اٹھا سکتے ہیں۔

ترجمان نے واضح کیا کہ ابتدائی رجسٹریشن کے لیے کسی قسم کی فیس نہیں لی جا رہی، تاہم وقت پر رجسٹریشن کروانا لازمی ہے۔ صرف وہی افراد حج 2026 کے لیے اہل تصور کیے جائیں گے جنہوں نے مقررہ وقت کے اندر رجسٹریشن مکمل کی ہو۔

رجسٹریشن کے بعد عازمین کو یہ اختیار حاصل ہو گا کہ وہ سرکاری یا نجی حج اسکیم میں سے کسی ایک کا انتخاب کریں۔ حج سے متعلق اخراجات، رہائش، سفری سہولیات اور دیگر تفصیلات حج پالیسی کے تحت بعد میں جاری کی جائیں گی۔

وزارت کے مطابق، یہ رجسٹریشن حکومتِ سعودی عرب کی ہدایات کی روشنی میں کی جا رہی ہے، تاکہ پاکستان کو دیا جانے والا حج کوٹہ حتمی اعداد و شمار کی بنیاد پر طے کیا جا سکے۔