نیتن یاہو کا دو ریاستی حل سے دوٹوک انکار، فلسطینیوں کی غزہ سے بے دخلی کے منصوبے کی حمایت

اسرائیلی وزیراعظم بینجمن نیتن یاہو نے واشنگٹن میں امریکی صدر ڈونلڈ ٹرمپ سے ملاقات کے دوران فلسطین میں دو ریاستی حل کے تصور کو واضح طور پر مسترد کر دیا ہے۔ ان کا کہنا تھا کہ اگرچہ فلسطینیوں کو محدود سطح پر خود مختاری دی جا سکتی ہے، لیکن سیکیورٹی جیسے اہم معاملات ہمیشہ اسرائیل کے اختیار میں رہیں گے۔

ملاقات کے دوران صدر ڈونلڈ ٹرمپ نے بھی فلسطینیوں کی غزہ سے ممکنہ بے دخلی سے متعلق ایک متنازع منصوبے پر پیش رفت کا عندیہ دیا۔ انہوں نے کہا، "ہمیں علاقائی ممالک سے اس سلسلے میں مثبت اشارے ملے ہیں، کچھ بڑا ہونے والا ہے۔"

وزیراعظم نیتن یاہو نے انکشاف کیا کہ اسرائیل، امریکا کے تعاون سے غزہ کے شہریوں کو ہمسایہ ممالک میں منتقل کرنے پر غور کر رہا ہے۔ ان کے بقول، "اگر فلسطینی رضاکارانہ طور پر جانا چاہیں، تو ہم اس کی راہ ہموار کریں گے، تاکہ وہ ایک بہتر مستقبل حاصل کر سکیں۔"

یہ ملاقات ایسے وقت میں ہوئی ہے جب اسرائیل اور ایران کے درمیان حالیہ کشیدگی کے بعد جنگ بندی کے لیے سفارتی کوششیں تیز ہو چکی ہیں۔ صدر ٹرمپ نے ایران سے براہِ راست بات چیت کی خواہش ظاہر کی اور اشارہ دیا کہ مناسب حالات میں ایران پر عائد پابندیاں اٹھائی جا سکتی ہیں۔

ملاقات کے دوران نیتن یاہو نے صدر ٹرمپ کو نوبیل امن انعام کے لیے ایک باضابطہ خط بھی پیش کیا، جس پر ٹرمپ نے خوشی کا اظہار کیا۔

دوسری جانب، وائٹ ہاؤس کے باہر فلسطینیوں اور انسانی حقوق کے کارکنان نے شدید احتجاج کیا، جس میں نیتن یاہو کی گرفتاری اور اسرائیل کو امریکی اسلحے کی فراہمی بند کرنے کا مطالبہ کیا گیا۔