وزیراعظم سے کونٹینٹ کریئیٹر طلحہ احمد کی ملاقات، اعزازی شیلڈ اور ٹیبلیٹ بطور انعام

وزیراعظم محمد شہباز شریف سے معروف ڈیجیٹل کونٹینٹ کریئیٹر طلحہ احمد نے ملاقات کی، جس کے دوران وزیراعظم نے ان کی تخلیقی صلاحیتوں کو سراہتے ہوئے اعزازی شیلڈ اور ایک الیکٹرانک ٹیبلیٹ بطور انعام پیش کیا۔

تفصیلات کے مطابق وزیراعظم نے طلحہ احمد کی ڈیجیٹل پلیٹ فارمز پر مثبت، متاثر کن اور تخلیقی مواد کو سراہا اور ان کی محنت کو پاکستانی نوجوانوں کے لیے ایک قابلِ تقلید مثال قرار دیا۔

وزیراعظم کا کہنا تھا کہ "طلحہ احمد پاکستان کے باصلاحیت نوجوانوں کی ایک نمایاں مثال ہیں، جو ڈیجیٹل دنیا میں ملک کا نام روشن کر رہے ہیں۔ ہمارے نوجوان اور بچے آج کے جدید دور میں عالمی سطح پر اپنی صلاحیتوں کا لوہا منوا رہے ہیں۔"

طلحہ احمد نے وزیراعظم کی جانب سے دی گئی پذیرائی، حوصلہ افزائی اور اعزاز پر ان کا شکریہ ادا کرتے ہوئے کہا کہ وہ مستقبل میں بھی پاکستان کی مثبت تصویر اجاگر کرنے کے لیے اپنا کردار ادا کرتے رہیں گے۔