بلوچستان ، سکیورٹی فورسز کا فتنہ الہندوستان کے خلاف کامیاب آپریشن،4 دہشتگرد ہلاک

بلوچستان میں سکیورٹی فورسز نے فتنہ الہندوستان کے خلاف کامیاب آپریشن کرتے ہوئے 4 دہشت گردوں کو جہنم واصل کر دیا۔

ذرائع کے مطابق دہشت گردوں کے خلاف آپریشن 19 اور 20 جولائی 2025 کی درمیانی شب کیا گیا، سکیورٹی فورسز نے بلوچستان میں دہشت گردوں کی نقل و حرکت پر آپریشن کیا، پہرود میں کارروائی کے دوران فتنہ الہندوستان کا جھنڈا اور ہتھیار بھی برآمد ہوئے۔

علاقے میں کلیئرنس آپریشن جاری ہے، فتنہ الہندوستان کے دہشت گردوں اور ان کے سہولت کاروں کو نشان عبرت بنایا جائے گا تاکہ کوئی اور دشمن پاکستان کی طرف میلی آنکھ سے نہ دیکھ سکے۔

فتنہ الہندوستان کا نیٹ ورک حالیہ دنوں میں نہتے شہریوں، خواتین اور بچوں کو نشانہ بناتا رہا ہے، اور ان کی بزدلانہ کارروائیاں قومی سلامتی کے لیے ایک سنگین خطرہ بن چکی تھیں۔

سکیورٹی فورسز نے واضح کیا ہے کہ وطن عزیز کو عدم استحکام سے دوچار کرنے والے ان ناپاک عزائم کو ہر قیمت پر ناکام بنایا جائے گا۔