کوئٹہ:سوشل میڈیا پر خاتون اور مرد کے بہیمانہ قتل کی وائرل ویڈیو پر وزیر اعلی کا نوٹس

کوئٹہ: وزیر اعلی سرفراز بگٹی نےبلوچستان کے علاقے مارگٹ میں خاتون اور مرد کے قتل کے واقعے کا نوٹس لیتے ہوئےملوث ملزمان کی فوری گرفتاری کا حکم دے دیا۔

تفصیلات کے مطابق سوشل میڈیا پر مرد اور خاتون کے بہیمانہ قتل کی ایک دل دہلا دینے والی ویڈیو وائرل ہونے پر وزیر اعلیٰ بلوچستان سرفراز بگٹی نے واقعے کا سختی سے نوٹس لیتے ہوئے تحقیقات اور ملوث تمام ملزمان کی گرفتاری کا حکم دے دیا۔
ترجمان بلوچستان حکومت شاہد رند کے مطابق وزیر اعلیٰ نے فوری طور پر واقعے کی جامع تحقیقات کا حکم دیتے ہوئے قانون نافذ کرنے والے اداروں کو ہدایت کی ہے کہ جائے وقوعہ کا تعین کرکے اس واقعے میں ملوث تمام افراد کو جلد از جلد گرفتار کر کے قانون کے کٹہرے میں لایا جائے۔
انہوں نے مزید بتایاکہ وزیر اعلیٰ میر سرفراز بگٹی نے کہا ہے کہ ایسی سفاکانہ حرکات نہ صرف ناقابل برداشت ہیں بلکہ یہ معاشرتی اقدار اور انسانی وقار کی سنگین توہین بھی ہیں۔ترجمان حکومت نے واضح کیا کہ ریاست کی عملداری کو چیلنج کرنے والوں سے سختی سے نمٹا جائے گا اور کسی کو قانون ہاتھ میں لینے کی اجازت نہیں دی جا سکتی،ان کا کہنا تھا کہ ویڈیو میں دکھائی گئی بربریت ہر سطح پر قابل مذمت ہے اور حکومت بلوچستان اس ظلم پر خاموش تماشائی نہیں بنے گی۔
ترجمان شاہد رند نے مزید کہا کہ واقعے میں ملوث عناصر کو انصاف کے تقاضوں کے مطابق قرار واقعی سزا دلوانے کے لیے تمام قانونی ذرائع بروئے کار لائے جائیں گے۔

 ترجمان صوبائی حکومت شاہد رند کا کہنا ہے کہ ایک ملزم کو گرفتار کرلیا جبکہ دیگر افراد کی شناخت جاری ہے، واقعہ عید الاضحیٰ پر پیش آیا تھا۔
خیال رہے کہ سوشل میڈیا پر وائرل ہونے والی ایک ویڈیو میںدیکھا جا سکتا ہے کہ بلوچستان کے کسی دوردراز علاقے میں متعدد مسلح مردوں کی موجودگی میں ایک خاتون اور مرد کو قتل کرتے ہوئے دکھایا گیا ہےجن کوخاتون کے گھر والوں نے شوہر کے ساتھ کھانے کی دعوت پر بلایا اور بعدازاں ایک ویرانے میں لے جا کر دونوں کو گولی مار کر قتل کردیا گیا۔