فیلڈ مارشل سے ملک کی اہم کاروباری شخصیات کی ملاقات، معاشی چیلنجز پر تفصیلی بریفنگ

 فیلڈ مارشل جنرل عاصم منیر سے ملک کی اہم کاروباری شخصیات نے ملاقات کی، جس میں انہیں ملکی معیشت کے موجودہ حالات اور مستقبل کے معاشی چیلنجز پر تفصیلی بریفنگ دی گئی۔

ملاقات کی قیادت سابق نگراں وفاقی وزیر گوہر اعجاز نے کی جبکہ اس میں دیگر اہم کاروباری رہنما بھی شریک ہوئے، جن میں اپٹما کے چیئرمین کامران ارشد، ایس ایم تنویر اور ایف پی سی سی آئی و لاہور چیمبر کے صدور شامل تھے۔

ملاقات کے دوران گوہر اعجاز نے فیلڈ مارشل کو بتایا کہ کاروباری برادری موجودہ حکومت کی معاشی پالیسیوں کی حمایت کر رہی ہے اور وہ اس بات کی خواہاں ہے کہ معیشت کی بہتری کے لیے مزید کاروباری آسانیاں فراہم کی جائیں۔

انہوں نے معیشت میں استحکام کی اہمیت پر زور دیتے ہوئے کہا کہ حکومت کو معاشی اصلاحات کے عمل میں تیز رفتار اقدامات کرنے کی ضرورت ہے۔ شرح سود کو مہنگائی کے تناسب سے کم کرنے کی ضرورت ہے تاکہ کاروباری سرگرمیاں بڑھ سکیں۔

انہوں نے وفاقی بجٹ کے حوالے سے کاروباری برادری کے تحفظات کو دور کرنے پر زور دیا اور کہا کہ حکومت کو اپنے وعدوں کو پورا کرنے کی ضرورت ہے تاکہ برآمدات پر مبنی معیشت کو مزید مستحکم کیا جا سکے۔

سابق نگراں وزیر نے کہا کہ ملکی کپاس کی صنعت اور کسانوں کی ترقی کے لیے خصوصی اقدامات کیے جائیں تاکہ زرعی معیشت میں بھی بہتری لائی جا سکے۔