بنوں: ایف سی چیک پوسٹ پر دہشت گردوں کا حملہ ناکام، 6 اہلکار زخمی

خیبر پختونخوا کے ضلع بنوں کے سرحدی علاقے تختی خیل میں فرنٹیئر کانسٹیبلری (ایف سی) کی ایک چیک پوسٹ پر دہشت گردوں نے حملہ کیا، تاہم ایف سی اہلکاروں کی بروقت اور مؤثر جوابی کارروائی کے باعث حملہ ناکام بنا دیا گیا۔ واقعے میں ایف سی کے 6 اہلکار زخمی ہو گئے۔

ترجمان بنوں پولیس عامر خان کے مطابق، دہشت گردوں نے اچانک چیک پوسٹ کو نشانہ بنایا، تاہم ایف سی جوانوں نے فوری ردعمل دیتے ہوئے بھرپور مزاحمت کی، جس کے باعث حملہ آور فرار ہونے پر مجبور ہو گئے۔

زخمی اہلکاروں کو فوری طور پر بنوں کے ملٹری کمبائنڈ ہسپتال منتقل کر دیا گیا، جہاں انہیں ابتدائی طبی امداد فراہم کی جا رہی ہے۔

ترجمان کے مطابق، واقعے کے بعد پولیس ٹیمیں جائے وقوعہ پر پہنچ گئیں اور علاقے میں دہشت گردوں کی تلاش کے لیے سرچ آپریشن شروع کر دیا گیا ہے۔