پاکستان اور سعودی عرب کا سرمایہ کاری اور تکنیکی تعاون بڑھانے پر اتفاق

پاکستان اور سعودی عرب نے باہمی مفاد میں سرمایہ کاری اور تکنیکی تعاون کو فروغ دینے پر اتفاق کیا ہے۔

ترجمان دفتر خارجہ کے مطابق، اقوام متحدہ کی سلامتی کونسل کی صدارت کے دوران پاکستان کی جانب سے منعقدہ اعلیٰ سطحی تقریبات کے موقع پر نائب وزیراعظم و وزیر خارجہ اسحٰق ڈار اور سعودی وزیر برائے معیشت و منصوبہ بندی فیصل فاضل الابراہیم کے درمیان اہم ملاقات ہوئی۔

ملاقات میں دونوں ممالک کے برادرانہ تعلقات کو مزید مضبوط بنانے، پائیدار امن، مشترکہ خوشحالی اور علاقائی ہم آہنگی کے وژن کی توثیق کی گئی۔

دونوں رہنماؤں نے خوراک، صنعت، اور معدنیات کے شعبوں میں تعاون کو وسعت دینے پر اتفاق کیا، جبکہ پاکستان اور سعودی عرب کے درمیان سرمایہ کاری کو فروغ دینے کے لیے مشترکہ کوششوں پر زور دیا گیا۔

دفتر خارجہ کے مطابق، ملاقات کے دوران تکنیکی اشتراک اور اقتصادی روابط کو مزید مستحکم بنانے کے عزم کا بھی اعادہ کیا گیا۔