عمران خان نے اپنے بیٹوں کو پاکستان آنے سے نہیں روکا ، پی ٹی آئی

لاہور:  پاکستان تحریک انصاف کے مرکزی سیکرٹری اطلاعات شیخ وقاص اکرم نے ان میڈیا رپورٹس کی سختی سے تردید کی ہےجن میں دعوی کیا گیا تھا کہ عمران خان نے اپنے بیٹوں قاسم اور سلیمان کو پاکستان آنے سے روک دیا ہے۔ 

تفصیلات کے مطابق شیخ وقاص نے واضح کیا کہ ایسی تمام خبریں بے بنیاد اور جھوٹی ہیں، ان کا کہنا تھا کہ عمران خان کے بچے پاکستان آئیں گے، صرف تاریخ طے ہونا باقی ہے، بانی نے قاسم اور سلیمان کو پاکستان آنے سے قطعا نہیں روکا۔ 

دوسری جانب پی ٹی آئی رہنما عمر آیوب نے بھی کہا کہ عمران خان کے بیٹے واشنگٹن ڈی سی میں اپنے والد کے حق میں مہم چلا رہے ہیںاور جب چاہیں پاکستان آ سکتے ہیں، یہ ان کی ذاتی مرضی ہے کہ کب آنا چاہتے ہیں، کوئی رکاوٹ نہیں۔ 

واضح رہے عمر ایوب نے مزید کہا کہ یہ وضاحت اس وقت سامنے آئی جب ایک خبر میں دعوی کیا گیا کہ سابق وزیر اعظم عمران خان نے اپنے بیٹوں کو پاکستان آنے سے روک دیا ہے، جسے پی ٹی آئی کی جانب سے جھوٹا قرار دیا گیا۔