کوئی بھی سوال لکھیں اورفوری جواب پائیں ،  چیٹ جی پی ٹی کا نیا فیچر متعارف

آرٹیفیشل انٹیلی جنس (اےآئی) چیٹ جی پی ٹی نے طالبعلموں کی آسانی کے لیے نیا فیچرمتعارف کروادیا ۔اوپن اے آئی کی جانب سے اے آئی چیٹ بوٹ میں اسٹڈی موڈ نامی نیا فیچر متعارف کرایا گیا ہے،اس نئے فیچر کا مقصد طالبعلموں کو زیادہ قدرتی انداز سے سیکھنے کا موقع فراہم کرنا ہے ۔

کمپنی نے اس فیچر کا اعلان کرتے ہوئے بتایا ہےکہ اب آپ کوئی سوال ٹائپ کریں یا کسی موضوع کے بارے میں جاننے کے لیے چیٹ جی پی ٹی سے مدد لیں، تو اسٹڈی موڈ میں طالبعلموں کو تفصیل کے ساتھ درست جواب کے حصول میں مدد فراہم کی جائے گی۔

واضح رہے کہ اس سے قبل چیٹ بوٹ میں طالبعلموں کے سوالات پر چیٹ جی پی ٹی کی جانب سے سادہ جوابات دیے جاتے ہیں۔اس فیچر کے ساتھ طالبعلم چیٹ جی پی ٹی سے چیٹ بھی کرسکیں گے تاکہ سوالات کے بارے میں بہتر وضاحت حاصل کرسکیں اور اے آئی ٹول کسی استاد کی طرح کام کرے گااورطالبعلموں کے ساتھ مل کر کام کرتے ہوئے مدد فراہم کرے گا تاکہ وہ خود درست جواب تک پہنچ سکیں۔

یاد رہے کہ 2023میں چیٹ جی پی ٹی کو متعارف کرایا گیا تھا اور اس کے بعد اسے طالبعلموں کی جانب سے مضامین تحریر کرنے سمیت دیگر مقاصد کے لیے استعمال کیا جا رہا ہے۔

دوسری طرف اساتذہ کی جانب سے شکایت کی جاتی ہے کہ چیٹ جی پی ٹی کے باعث طالبعلم خود سوچنے یا مسائل حل کرنے کی بجائے بس اے آئی سے مدد لیتے ہیں جس سے ان کی ذہنی صلاحیتیں متاثر ہوتی ہیں۔

فیچر کو استعمال کرنے کے لیے صارفین چیٹ جی پی ٹی میں اپنے اکاؤنٹ سے لاگ ان ہوں۔اس کے بعد کسی بھی چیٹ میں ٹول مینیو پر کلک کرکے اسٹڈی اینڈ لرن (یا اسٹڈی موڈ) کا انتخاب کریں۔

یہ فیچر چیٹ جی پی ٹی پلس، پرو اور ٹیمز کے ساتھ ساتھ اس سروس کو مفت استعمال کرنے والے صارفین کو بھی دستیاب ہوگا۔