قومی اسمبلی : بھارت کے 5 اگست کے غیر قانونی اور یکطرفہ اقدامات کیخلاف قرارداد متفقہ طور پرمنظور

اسلام آباد: قومی اسمبلی نے یوم استحصال جموں و کشمیر کے حوالے سے قرارداد متفقہ طور پر منظور کر لی،جن میں بھارت کی جانب سے کیے گئے غیر قانونی اور یکطرفہ اقدامات کی شدید مذمت کی گئی ہے۔

تفصیلات کےمطابق قرارداد حکومتی رکن امیر مقام نے پیش کی جسے ایوان نے متفقہ منظور کر لیا گیا۔

قرارداد کے متن میں کہا گیا کہ 5 اگست 2019 کو بھارت کی جانب سے جموں و کشمیر میں غیر قانونی اقدامات کئے گئے، ایوان کشمیر کے حق خود ارادیت کے حصول کے لیے ایوان کشمیریوں کے ساتھ ہے۔

قرارداد میں مزید کہا گیا کہ ایوان بھارت کے تمام غیر آئینی اقدامات کو مسترد کرتا ہے، بھارت کے اقدامات اقوام متحدہ کی قراردادوں اور بین الاقوامی قوانین کی صریحاً خلاف ورزی ہیں۔

پیش کر دہ قرارداد کے مطابق ایوان کشمیری عوام کی قربانیوں بہادری اور جرات کو خراج تحسین پیش کرتا ہے، ایوان مطالبہ کرتا ہے کہ مسئلہ کشمیر کا حل اقوام متحدہ کی قراردادوں کے مطابق کیا جانا چاہیے، کشمیر کے تمام سیاسی قیدیوں کو رہا کیا جائے۔

خیال رہے کہ چھ سال قبل 5 اگست 2019 کو انتہا  پسند مودی حکومت نے آرٹیکل 370کا خاتمہ کرتے ہوئے جموں کشمیر کی خصوصی حیثیت کو ختم کر کے اس دو یونین ٹیرٹیری میں تقسیم کر دیا تھا۔