ملک میں پولیو وائرس پھیلنے کا خدشہ، وزیراعظم نے وزرائے اعلیٰ کا اجلاس طلب کرلیا

اسلام آباد: پاکستان میں پولیو وائرس کے خطرناک آؤٹ بریک کے پیش نظر وزیراعظم شہباز شریف نے خصوصی اجلاس طلب کر لیا۔

تفصیلات کے مطابق ملک کے 75 سے زائد اضلاع کے ماحولیاتی نمونوں میں پولیو وائرس کے موجود ہونے کا انکشاف ہوا ہے،جس کے پیش نظر وزیراعظم شہباز شریف نے چاروں وزرائے اعلیٰ اور چیف سیکرٹریز کو ذاتی طور پر وزیر اعظم ہاؤس میں طلب کر لیا ہے۔

ذرائع کے مطابق وزیراعظم کی سربراہی میں اجلاس 27 اگست کو وزیر اعظم آفس میں ہوگا جس میں ملک میں انسداد پولیو اقدامات اور کارکردگی کا تفصیلی جائزہ لیا جائے گا۔

این ای او سی کے مطابق کے ملک بھر میں قومی انسداد پولیو مہم یکم سے 7 ستمبر تک جاری رہے گی جس کے دوران 5 سال سےکم عمر کے 2کروڑ 80لاکھ بچوں کو قطرے پلائے جائیں گے،یہ مہم چاروں صوبوں اور تمام ریجنز کے 99 اضلاع میں منعقد کی جائے گی۔

خیال رہے کہ ملک کے 4 علاقوں کے ماحولیاتی نمونوں میں پولیو وائرس کی سب سے خطرناک قسم پائی گئی تھی جن میں دیامر، جنوبی وزیرستان، لاہور اور راولپنڈی کے نمونوں میں پولیو وائرس کی تصدیق ہوئی تھی۔