وزیراعظم شہباز شریف سیلاب متاثرہ علاقوں کی براہِ راست نگرانی کر رہے ہیں، عطا تارڑ

اسلام آباد (اسٹاف رپورٹر): وفاقی وزیر اطلاعات و نشریات عطااللہ تارڑ نے کہا ہے کہ وزیراعظم شہباز شریف سیلاب سے متاثرہ علاقوں کی صورتحال پر مسلسل نظر رکھے ہوئے ہیں اور متعلقہ حکام سے وقتاً فوقتاً براہِ راست اپ ڈیٹس لے رہے ہیں۔

اپنے بیان میں انہوں نے بتایا کہ وزیراعظم کی ہدایت پر وفاقی و صوبائی ادارے، این ڈی ایم اے، پی ڈی ایم اے، پاک فوج اور ایف ڈبلیو او ریلیف اور بحالی کے اقدامات میں مصروف ہیں۔ بیشتر علاقوں میں بجلی کی فراہمی بحال ہو چکی ہے، جبکہ سڑکوں کی مرمت اور متاثرہ افراد کی محفوظ مقامات پر منتقلی کا عمل بھی جاری ہے۔

عطا تارڑ کے مطابق آرمی چیف جنرل سید عاصم منیر کی ہدایت پر پاک فوج کی بٹالینز بھی فیلڈ میں ریسکیو اور ریلیف سرگرمیوں میں متحرک ہیں۔ وزیراعظم شہباز شریف نہ صرف گزشتہ روز سیلابی صورتحال پر اجلاس کی صدارت کر چکے ہیں بلکہ وہ بونیر کا دورہ بھی کر چکے ہیں۔

وزیر اطلاعات نے مزید بتایا کہ وزیراعظم کی ہدایت پر وزیر توانائی سردار اویس لغاری کو سوات بھیجا گیا جہاں سوات ون ڈویژن میں بجلی کی مکمل بحالی ہو چکی ہے، اور دیگر متاثرہ علاقوں میں بھی کام تیزی سے جاری ہے۔

انہوں نے کہا کہ نیشنل ہائی وے کسی مقام پر بند نہیں ہے، جبکہ رابطہ سڑکوں کی بحالی کا عمل بھی برق رفتاری سے جاری ہے۔ گلگت کی تحصیل گوپس سے متاثرہ خاندانوں کو محفوظ مقامات پر منتقل کر دیا گیا ہے۔

عطا تارڑ کے مطابق وزیراعظم آفس میں ایک خصوصی سیل قائم کر دیا گیا ہے جو متاثرہ علاقوں کی صورتحال کی براہِ راست نگرانی کر رہا ہے، جبکہ چیف سیکریٹریز کو خصوصی ہدایات بھی جاری کی گئی ہیں۔