11ویں قومی مالیاتی کمیشن ایوارڈ کا پہلا اجلاس 29 اگست کو طلب، ایجنڈا جاری

اسلام آباد: 11ویں قومی مالیاتی کمیشن (این ایف سی) ایوارڈ کا ابتدائی اجلاس 29 اگست کو وزیر خزانہ محمد اورنگزیب کی زیر صدارت طلب کر لیا گیا ہے، جس کا باضابطہ ایجنڈا بھی جاری کر دیا گیا ہے۔

 اجلاس میں تمام این ایف سی ارکان کو شرکت کی دعوت دے دی گئی ہے، جب کہ تین نکاتی ایجنڈے پر غور کیا جائے گا۔
اجلاس میں:

• این ایف سی ایوارڈ سے متعلق ابتدائی سفارشات پر مشاورت

• ذیلی گروپس کے قیام کا جائزہ

• آئندہ اجلاسوں کے شیڈول کی منظوری شامل ہے۔

یہ اجلاس آئین کے آرٹیکل 160 (1) کے تحت صدر مملکت آصف علی زرداری کی جانب سے دو روز قبل 11ویں قومی مالیاتی کمیشن کی تشکیل کے بعد طلب کیا گیا ہے۔

وزارت خزانہ کے تحت قائم این ایف سی سیکریٹریٹ کی جانب سے جاری نوٹیفکیشن کے مطابق کمیشن 9 ارکان پر مشتمل ہے۔ وزیر خزانہ محمد اورنگزیب کمیشن کے چیئرمین ہیں، جب کہ چاروں صوبوں کے وزرائے خزانہ اس کے رکن ہوں گے۔