افغان حکومت کا سفیرکو واپس بلانے کا فیصلہ افسوسناک ہے،ترجمان دفتر خارجہ

ترجمان دفتر خارجہ نے اپنے بیان میں کہاہے کہ افغان سفیر کی بیٹی کے اسلام آباد سے مبینہ اغوا کی تحقیقات جاری ہیں ،وزیراعظم کی ہدایت پر معاملے کی تحقیقات اعلیٰ سطح پر ہو رہی ہیں ۔

ترجمان کا مزید کہناتھا کہ سفیر ان کے اہلخانہ کی اورقونصل خانے کے عملے کی سکیورٹی مزید سخت کردی ہے،سیکرٹری خارجہ نے آج افغانستان کے سفیر سے ملاقات کی ،حکومت نے کئے گئے اقدامات پر روشنی ڈالی اورتعاون کی یقین دہانی کرائی ۔

یاد رہے افغان وزارت خارجہ نے کہا ہے کہ سیکیورٹی خدشات کے باعث افغانستان اپنے سفیر اور دیگر سینیئر سفارت کاروں کو کابل واپس بلا رہا ہے۔

انہوں نے کہا کہ سیکیورٹی خدشات ختم ہونے تک تمام سفیر کابل میں ہی رہیں گے۔ مطالبہ کیا کہ اغوا کاروں کی گرفتاری اور ان کے خلاف قانونی کارروائی کی جائے۔

واضح رہے کہ 16جولائی کو اسلام آباد میں تعینات افغانستان کے سفیر نجیب اللہ علی خیل کی بیٹی کو نامعلوم افراد نے اغواء کے بعد تشدد کا نشانہ بنایا اور کچھ گھنٹوں بعد چھوڑ دیا۔

خاتون کو پمز اسپتال میں داخل کیا گیا جبکہ پاکستان کی دفتر خارجہ نے واقعے کی تصدیق کی۔