امریکی شہر منی ایپلس کے اسکول میں فائرنگ سے 3 بچے جاں بحق،متعدد زخمی

ویب ڈیسک:امریکی شہر منی ایپلس کےاسکول میں فائرنگ کے نتیجے میں کم از کم 3 بچے جاںبحق اور 17 زخمی ہو گئے جبکہ شوٹر بھی مارا گیا۔

برطانوی نشریاتی ادارے کی رپورٹ کے مطابق فائرنگ کا یہ واقعہ امریکی شہر منی ایپلس کے چرچ میں قائم ایک اسکول میں پیش آیا جہاں مسلح شخص نے فائرنگ کردی جس کے نتیجے میں 3 بچے جاں بحْق اور 17 زخمی ہو گئے۔

مقامی پولیس چیف برائن او’ہاراکا کہنا ہےکہ حملہ آور کے پاس 3 ہتھیار تھے، جن میں ایک رائفل، ایک شاٹ گن اور ایک پستول شامل ہے۔انہوں نے بچوں سے بھرے چرچ پر فائرنگ کو ’انتہائی سفاکیت اور بزدلی‘ قرار دیا۔

پولیس چیف نے مزید کہا کہ 17 افراد زخمی ہوئے جن میں سے 14 بچے ہیں، ان میں سے دو بچوں کی حالت تشویشناک ہے۔

دوسری جانب امریکی صدر ڈونلڈ ٹرمپ نے ٹروتھ سوشل پر ایک پوسٹ میں کہا کہ انہیں اس واقعے کے بارے میں مکمل بریفنگ دی گئی ہے اور وائٹ ہاؤس صورتحال کی نگرانی جاری رکھے گا۔

ٹرمپ نے مزید کہا کہ ’ایف بی آئی نے فوری طور پر ردعمل ظاہر کیا اور وہ موقع پر موجود ہیں۔