شدید سیلابی صورتحال کےباعث پنجاب میں ٹرینیں منسوخ ،متعدد کے شیڈول تبدیل

لاہور: صوبہ بھر میں جاری شدید سیلابی صورتحال کے پیش نظر پاکستان ریلوے نے لاہور اور سیالکوٹ کے درمیان چلنے والی ٹرینوں کو معطل جبکہ دیگر کے شیڈول تبدیل کر دئیے۔

تفصیلات کے مطابق کراچی سے لاہور آکر مارگلہ جانے والی گرین لائن لاہور تک محدود کردی گئی ،کراچی سے آنے والی گرین لائن کے مسافروں کو تیز گام میں ایڈجسٹ کیا جائے گا،اسی طرح تیز گام کو براستہ شاہدرہ، سانگلہ ہل، شاہین آباد اور سرگودھا راولپنڈی پہنچایا جائے گا۔

جبکہ محکمہ ریلوے نے لاہور، سیالکوٹ کے درمیان چلنے والی سیالکوٹ ایکسپریس منسوخ کردی گئی،تیزگام ، جعفرایکسپریس اور عوام ایکسپریس کو براستہ لالہ موسیٰ خانیوال پہنچایا جائے گا۔

اسی طرح گرین لائن اور رحمان بابا ایکسپریس کو براستہ سرگودھا خانیوال پہنچایا جائے گا،جبکہ کراچی سے پشاور جانے والی خیبرمیل کو لاہور، ملکوال کے راستے پشاور پہنچایا جائے گا،تیزگام اور جعفر ایکسپریس کے مسافروں کو خانیوال پہنچانے کیلئے لاہور سے شٹل ٹرین چلے گی۔

جبکہ عوام ایکسپریس اور گرین لائن کے مسافروں کو خانیوال پہنچانے کیلئے دوسری شٹل ٹرین چلائی جائے گی،لاہور سے براستہ ساہیوال کراچی جانے والی تمام ٹرینیں اپنے مقررہ راستے سے کراچی پہنچیں گی۔