اسسٹنٹ کمشنر پتوکی فلڈ ریلیف آپریشن کے دوران دل کا دورہ پڑنے سے انتقال کرگئے

اسسٹنٹ کمشنر پتوکی سیلاب کے دورے کے دوران دل کا دورہ پڑنے سے انتقال کرگئے

پولیس کے مطابق اسسٹنٹ کمشنر سیلابی علاقوں میں جاری آپریشن کی نگرانی میں مصروف تھے اور پچھلے پانچ دن سے پتوکی ہیڈبلوکی کے مقام پر ریسٹ ہاؤس میں ہی سورہے تھے۔ اسسٹنٹ کمشنر پتوکی شدید ذہنی دباؤ میں مبتلا تھے، فرقان احمد کی لاش اسپتال منتقل کردی گئی ہے۔

رپورٹس کے مطابق دوران ڈیوٹی انہیں دل کا دورہ پڑا جو جان لیوا ثابت ہوا۔

پولیس نے مزید بتایا کہ اسسٹنٹ کمشنر کی لاش واش روم سے ملی ہے، جبکہ ریسٹ ہاؤس اسٹاف کے مطابق فرقان احمد کی موت شریان پھٹنے سے ہوئی ہے۔

اسسٹنٹ کمشنر پتوکی فرقان احمد کے انتقال پر ڈی جی پی ڈی ایم اے عرفان علی کاٹھیا نے گہرے غم اور افسوس کا اظہار کیا ہے۔

ڈی جی پی ڈی ایم اے کے مطابق اے سی پتوکی فرقان احمد ہیڈ بلوکی پر ڈیوٹی پر مامور تھے۔

ان کا مزید کہنا تھا کہ فرقان احمد کی خدمات کو ہمیشہ یاد رکھا جائے گا۔