وزیراعظم نے پنجاب ایگریکلچر، فوڈ اینڈ ڈرگ اتھارٹی کا افتتاح کردیا

وزیراعظم محمد شہبازشریف نے آج لاہور میں پنجاب ایگریکلچر، فوڈ اینڈ ڈرگ اتھارٹی کا افتتاح کیا۔

وزیر اعلیٰ پنجاب مریم نواز شریف اور وفاقی اور صوبائی وزراء بھی اس موقع پر ان کے ہمراہ تھے۔

تقریب سے خطاب کرتے ہوئے وزیراعظم نے کہا کہ جدید ٹیکنالوجی سے لیس یہ جدید ادارہ ملاوٹ کے خاتمے میں اہم کردار ادا کرے گا۔

انہوں نے کہا کہ ملک میں یہ منفرد اقدام غذائی تحفظ یقینی بنانے اور حفظان صحت کے معیارات کو برقرار رکھنے میں اہم کردار ادا کرے گا، انہوں نے کہا کہ اس ادارے کا قیام وقت کی ضرورت تھی۔

وزیراعظم نے اس اہم ادارے کے قیام میں وزیراعلیٰ پنجاب مریم نواز شریف کی کاوشوں کو سراہتے ہوئے کہا کہ یہ لیب مختلف مصنوعات کے معیار کو جانچنے میں معاون ثابت ہوگی۔

انہوں نے کہا کہ اس اقدام سے بڑی عوامی خدمت کوئی نہیں ہو سکتی جس سے پنجاب سمیت ملک بھر کو فائدہ ہوگا۔

وزیر اعلیٰ پنجاب مریم نواز شریف نے اس موقع پر خطاب کرتے ہوئے کہا کہ کھاد، کیڑے مار ادویات، خوراک، کاسمیٹکس، ادویات اور جانوروں کی خوراک سمیت تمام اشیا کی لیبارٹری میں جانچ کی جاتی ہے۔

انہوں نے کہا کہ ادارے میں دو سو بتیس سائنسدان کام کر رہے ہیں۔