بلوچستان میں دہشتگردی کے پیچھے بھارت کا ہاتھ ، بی ایل عورتوں بچوں کو استعمال کر رہا ہے، خواجہ آصف

سیالکوٹ:وزیر دفاع خواجہ آصف نے کہا ہے کہ بلوچستان میں دہشتگردی کے پیچھے بھارت کا ہاتھ ہے،کالعدم بی ایل اے کو بھارت سے فنڈنگ ہوتی ہے جو عورتوںاور بچوں کو استعمال کرتے ہوئے غریب، مزدور اور بے روزگاروں کو نشانہ بناتے ہیں۔

تفصیلات کے مطابق اپنے آبائی شہر سیالکوٹ میں میڈیا نمائندوں سے گفتگو کرتے ہوئےخواجہ آصف نے کہا کہ دہشت گردوں کا خاتمہ کر کے دم لیں گے،وطن عزیز ترقی کے سفر پر گامزن ہوچکا ہے، دہشتگرد ہماری سالمیت کو نقصان پہنچانا چاہتے ہیں، گرفتاردہشتگردوں کے بیانات ہندوستان کی جانب اشارہ کرتے ہیں۔

انہوں نے بتایا کہ کل بلوچستان کے 12شہروں میں دہشتگردی کے واقعات ہوئے، ان 12دہشتگردی کے واقعات میں 2جگہ خواتین بھی ملوث پائی گئیں، کل پسنی میں بھی ایک خودکش حملہ آور نوجوان بچی پائی گئی ہے، ہوسکتا ہے مارے گئے دہشتگردوں کی تعداد مزید بڑھے، ہمارے 11جوانوں کی شہادتیں ہوئیں، جبکہ پچھلے دودن میں 100سے زائد دہشت گرد جہنم واصل ہوئے۔

انہوں نے کہا کہ بی ایل اے اور بی وائے سی لاپتہ افراد کا بھی بیانیہ بناتی ہے، زیادہ تر لاپتہ افراد بی ایل اے سمیت دہشتگرد تنظیموں کے ارکان ہیں، یہ ٹوٹل فراڈ ہے صرف ایک بیانیہ بنایا گیا ہے، اب یہ چھوٹے بچوں اورخواتین کو بھی استعمال کررہے ہیں۔

انہوں نے کہا کہ دہشتگرد عناصر کا مقصد پاکستان کو عدم استحکام اور معاشی تباہی کی طرف دھکیلنا ہے، مگر سیکیورٹی فورسز نے بروقت اور مؤثر کارروائی کرتے ہوئے ان کے عزائم ناکام بنا دیے ہیں۔

انہوں نے کہا کہ گرفتار دہشتگردوں کے بیانات اور انٹیلی جنس رپورٹس بھارت کی جانب واضح اشارہ کرتی ہیں، جبکہ دہشتگردوں کے روابط بھی بھارت اور افغانستان سے ملتے ہیں،حالیہ دنوں میں بلوچستان میں دہشتگردی کے بارہ مختلف واقعات پیش آئے، جن میں نوشکی اور دالبندین میں ایف سی ہیڈکوارٹرز کو نشانہ بنایا گیا۔

خواجہ آصف نے واضح کیا کہ بڑا رقبہ ہونے کی وجہ سے دہشتگردوں کو بلوچستان میں کارروائی میں آسانی ہوتی ہے، سکیورٹی فورسز کلیئرنس آپریشن میں مصروف ہیں، ان لوگوں نے انسانی حقوق کا بھی لبادہ اوڑھا ہوا ہے، بھارتی سہولت کاروں کو بھی وہیں پہنچائیں گے جہاں دہشتگردوں کو پہنچایا۔