یوکرین میں مزدوروں کی بس پر روسی ڈرون حملہ، 15 کان کن جاں بحق

کیف: یوکرین میں روس کی جانب سے ڈرون حملوں کا سلسلہ جاری ہے، تازہ وحملوں میںروس نے مزدوروں کو لے جانے والی ایک بس کو نشانہ بنایا ہے، جس کے نتیجے میں پندرہ کان کن ہلاک اور متعدد افراد زخمی ہو گئے۔

غیر ملکی میڈیا رپورٹس کے مطابق اس حوالے سےیوکرینی حکام کا کہنا ہے کہ یہ حملہ اس وقت کیا گیا جب بس کان کنوں کو کام کے لیے لے جا رہی تھی۔

حکام کے مطابق حملے کے بعد زخمیوں کو فوری طور پر قریبی اسپتال منتقل کیا گیا، جہاں بعض کی حالت تشویشناک بتائی جا رہی ہے۔

میڈیا رپورٹس میں مزید بتایا گیا ہےکہ اسی علاقے میں واقع ایک اسپتال کو بھی روسی ڈرون حملے کا نشانہ بنایا گیا، جس کے باعث چھ افراد زخمی ہو گئے۔ اسپتال پر حملے کے بعد امدادی سرگرمیوں میں شدید مشکلات کا سامنا کرنا پڑا۔

دوسری جانب اس واقعے پر یوکرینی صدر زیلنسکی نے گہرے دکھ اور افسوس کا اظہار کرتے ہوئے جاں بحق افراد کے لواحقین سے تعزیت کی ہے۔

صدر کا کہنا تھا کہ شہریوں اور طبی مراکز کو نشانہ بنانا بین الاقوامی قوانین کی سنگین خلاف ورزی ہے۔

حکام کے مطابق ڈرون حملوں کے بعد سیکیورٹی مزید سخت کر دی گئی ہے، جبکہ متاثرہ علاقوں میں ریسکیو اور امدادی کارروائیاں جاری ہیں۔