سوڈان:مارا کے پہاڑوں میں خوفناک لینڈ سلائیڈنگ سے ایک ہزار افراد ہلاک

سوڈان میں باغی گروپ لبریشن موومنٹ کے مطابق مغربی سوڈان کے دور دراز علاقے مارا کے پہاڑوں میں خوفناک لینڈ سلائیڈنگ کے نتیجے میں کم از کم ایک ہزار افراد ہلاک ہو گئے ہیں۔

باغی گروپ کی جانب سے جاری ہونے والے ایک بیان میں کہا گیا ہے کہ گزشتہ کئی دنوں کی جاری موسلادھار بارش کی وجہ سے لینڈ سلائیڈنگ ہوئی جس کی وجہ سے تاراسین نامی گاؤں میں صرف ایک فرد زندہ بچا ہے جبکہ باقی پورا گاؤں ملبے تلے دب جانے کی وجہ سے تباہ ہو گیا ہے۔

باغی گروپ لبریشن موومنٹ کی جانب سے اقوام متحدہ اور دیگر علاقائی اور بین الاقوامی تنظیموں سے انسانی امداد کی اپیل کی گئی ہے۔

سوڈانی فوج اور نیم فوجی ریپڈ سپورٹ فورسز کے درمیان جنگ کے بعد شمالی دارفور ریاست کے بہت سے رہائشیوں نے مارا نامی پہاڑی علاقے میں پناہ لی تھی۔

واضح رہے کہ اپریل 2023 سے شروع ہونے والی اس خانہ جنگی نے سوڈان کو قحط سالی میں دھکیل دیا ہے، جب کہ مغربی دارفور میں نسل کشی کے الزامات بھی سامنے آ چکے ہیں۔

خانہ جنگی میں ہلاکتوں کے اعداد و شمار متضاد ہیں، لیکن ایک امریکی عہدیدار نے گزشتہ سال اندازہ لگایا تھا کہ 2023 سے اب تک 150,000 افراد ہلاک ہو چکے ہیں، جب کہ تقریباً ایک کروڑ 20 لاکھ افراد بے گھر ہو چکے ہیں۔

مَرّا پہاڑوں کے اس علاقے پر قابض سوڈان لبریشن موومنٹ کے مختلف دھڑوں نے آر ایس ایف کے خلاف سوڈانی فوج کے ساتھ مل کر لڑنے کا اعلان کیا ہے۔