نوبیاہتی دلہن پر جنسی تشدد اور ہلاکت کا معاملہ،عدالت نے ملزم کی درخواست ضمانت مستردکر دی

کراچی: عدالت نے نوبیاہتا دلہن پر جنسی تشدد اور ہلاکت کے کیس میں نامزد ملزم کی ضمانت کی درخواست مستردکردی۔

تفصیلات کے مطابق کراچی کے ایڈیشنل ڈسٹرکٹ اینڈ سیشن جج نے لیاری میں نوبیاہتی دلہن پر جنسی تشدد اور ہلاکت کے کیس کی سماعت کی۔

دوران سماعت پولیس حکام نے عدالت کو بتایا کہ ملزم نے اپنی اہلیہ پر شدید جنسی تشدد کیا جس کے  بعد خاتون چند دن کومہ میں رہیں اور پھر انتقال کر گئی۔ 

دوران سماعت پولیس نے عدالت کو مزید بتایا کہ ملزم اپنے جرم کا اعتراف بھی کرچکا ہے اور ملزم کے خلاف تھانہ بغدادی میں مقدمہ درج ہے۔ 
بعد ازاں سیشن عدالت نے ملزم اشوک کی درخواست ضمانت مسترد کردی۔ 

خیال رہے کہ 23 جولائی کو سندھ کے دارالحکومت کراچی میں شوہر کے مبینہ بدترین جنسی تشدد کے بعد کوما میں جانے والی نوبیاہتا لڑکی انتقال کر گئی تھی۔

پولیس سرجن ڈاکٹر سمعیہ سید نے بتایا تھا کہ شوہر کے بہیمانہ جنسی تشدد کا نشانہ بننے والی 19 سالہ شانتی 23 جولائی کی صبح 10 بج کر 45 منٹ پر سول ہسپتال کے ٹراما سینٹر میں دم توڑ گئی تھی۔