وزیراعلیٰ علی امین گنڈا پور نے کالا باغ ڈیم کی حمایت کر دی

اسلام آباد: وزیراعلیٰ خیبرپختونخوا علی امین گنڈاپور نے کالا باغ ڈیم کی حمایت کر دی۔

تفصیلات کے مطابق اسلام آباد میں پارٹی اجلاس کے بعد میڈیا سے گفتگو کرتےہوئےوزیراعلیٰ خیبرپختونخوا علی امین گنڈا پور نےکہا کہ کالا باغ ڈیم ریاست کیلئے ضروری ہے، کسی کے اعتراضات ہیں تو دور کر کے ڈیم بنایا جائے۔

انہوں نے کہا کہ صوبائیت کے چکر میں پورے پاکستان کو نقصان نہیں پہنچا سکتا، پورے ملک کے فائدے کو پیچھے نہیں دھکیل سکتا،پاکستان کے فائدے کو پیچھے نہیں دھکیلا جا سکتا۔

میڈیا سےگفتگو میں علی امین گنڈا پور کا کہنا تھا کہ ہم کالا باغ کی تعمیر کیلئے حصہ ڈالنے کو تیار ہیں، دیگر صوبے بھی حصہ ڈالیں تاکہ منصوبہ ممکن ہو سکے، پاکستان میں قدرتی آفات کے حوالے سے کام نہیں کیا گیا اور نہ ہی ڈیم بنائے گئے۔

اُن کا کہنا تھا کہ  خیبر پختونخوا اس وقت بارشوں، کلاوڈ برسٹ اور فلیش فلڈ کا شکار ہے،صوبہ اپنے دستیاب وسائل سے امدادی اور ریلیف سرگرمیاں سرانجام دے رہا ہے۔

علی امین گنڈا پور نے مزید کہا کہ پنجاب ہمارا بھائی ہے، اس میں رہنے والے تمام لوگ ہمارے اپنے ہیں، ہم سے جتنا ہو سکا اپنے بھائیوں کے لیے ضرور کریں گے۔

وزیراعلیٰ کے پی نے مزید کہا کہ بارشوں سے ہمارے کئی شہروں میں نقصانات ہوئے، 490 افراد خیبرپختونخوا میں سیلابی ریلوں کی نذر ہوگئے، وقت پر ڈیم بنائے ہوتے تو اتنا نقصان نہ ہوتا، بدقسمتی سے ہم نے ماضی میں کچھ نہیں کیا۔