دریائے چناب میں اونچے درجے کا سیلاب، 500 دیہات خالی، خطرے کی گھنٹی بج گئی

بھارت سے آنے والا دوسرا بڑا سیلابی ریلا پاکستان میں دریائے چناب میں داخل ہو گیا ہے، جس کے باعث ہیڈ مرالہ پر انتہائی اونچے درجے کا سیلاب ریکارڈ کیا گیا ہے۔

انتظامیہ کے مطابق، خطرناک صورتحال کے پیش نظر چناب پل کو ہر قسم کی ٹریفک کے لیے بند کر دیا گیا ہے، جب کہ سیلابی ریلا ہیڈ خانکی کی طرف بڑھ رہا ہے۔ اگر پانی کا بہاؤ 6 لاکھ کیوسک سے تجاوز کرتا ہے تو پل ہیڈ خانکی کے قریب پہلا حفاظتی شگاف ڈالنے کی تیاری مکمل کر لی گئی ہے۔

حکام کے مطابق مساجد کے ذریعے اعلانات کر کے 500 دیہات (ابتدائی طور پر 450 کی اطلاع) خالی کرائے جا چکے ہیں، جب کہ بھلوال کے علاقے میں شدید دریائی کٹاؤ کے نتیجے میں کئی ایکڑ زرعی اراضی تباہ ہو چکی ہے۔

دوسری جانب، دریائے راوی کا پانی بھی ملتان کے علاقوں کو متاثر کر رہا ہے، اور عبدالحکیم کے قریب ریلوے ٹریک پر پانی چڑھ آیا ہے۔ دباؤ کم کرنے کے لیے ہیڈ محمد والا پر واقع اکبر فلڈ بند میں شگاف ڈالنے پر غور کیا جا رہا ہے۔

بھارت کی جانب سے پیشگی اطلاع:

بھارتی ہائی کمیشن نے پاکستان کو ایک مراسلہ بھیجا ہے، جس میں آگاہ کیا گیا ہے کہ دریائے ستلج میں بھی اونچے درجے کے سیلاب کا خدشہ ہے۔ بھارتی اطلاع کے مطابق، ہریکے زیریں، فیروزپور زیریں اور مقبوضہ جموں میں دریائے توی پر بھی بلند درجے کا سیلاب متوقع ہے۔