اسلام آباد، پشاور اور ملک کے مختلف شہروں میں زلزلے کے شدید جھٹکے

وفاقی دارالحکومت اسلام آباد، پشاور اور ملک کے مختلف شہروں میں زلزلے کے شدید جھٹکے محسوس کیے گئے، جن سے شہری خوف و ہراس کا شکار ہو گئے۔

زلزلے کے جھٹکے اسلام آباد، راولپنڈی، اٹک، چکوال، تلہ گنگ، کلرکہار، میانوالی اور ملتان سمیت پنجاب کے کئی علاقوں میں محسوس کیے گئے، جبکہ خیبرپختونخوا میں پشاور، سوات، مالاکنڈ، اپر و لوئر دیر، باجوڑ، نوشہرہ، ہنگو، کوہاٹ، ایبٹ آباد، مانسہرہ، مہمند، شبقدر، چارسدہ اور پاراچنار میں بھی زمین لرز اٹھی۔

آزاد کشمیر کے علاقوں، خصوصاً دھیر کوٹ اور وادی نیلم میں بھی جھٹکے ریکارڈ کیے گئے۔ زلزلہ پیما مرکز کے مطابق ریکٹر اسکیل پر زلزلے کی شدت 5.9 اور گہرائی 111 کلومیٹر تھی، جبکہ مرکز ہندوکش ریجن، افغانستان میں واقع تھا۔ زلزلے کے دوران شہری کلمہ طیبہ کا ورد کرتے ہوئے خوف کے عالم میں گھروں، دفاتر اور دکانوں سے باہر نکل آئے، تاہم تاحال کسی جانی یا مالی نقصان کی اطلاع نہیں ملی۔