علیمہ خان کی توہین قابل مذمت اور ناقابل برداشت ہے، مولانا فضل الرحمان کی مذمت 

ویب ڈیسک: جے یو آئی (ف) کے سربراہ مولانا فضل الرحمان نے کہا ہے کہ علیمہ خان کی توہین قابل مذمت اور ناقابل برداشت ہے۔

گزشتہ روزپاکستان تحریک انصاف (پی ٹی آئی )کے بانی عمران خان کی ہمشیرہ علیمہ خانم کو میڈیا سے گفتگو کے دوران 2 خواتین کی جانب سے انڈا مارنے کے واقعے کی مذمت کی جارہی ہے۔

اس حوالے سے مولانا فضل الرحمان نے بھی اس واقعے کی سخت الفاظ میں مذمت کرتے ہوئے اسے ناقابل برداشت قرار دیا۔

میڈیا سے گفتگو کرتے ہوئے ان کا کہنا تھا کہ ہمارے ہاں خواتین کی حرمت اور سماجی روا داری پر پورا معاشرتی نظام قائم ہے، جارحیت سے علیمہ خانم ہی نہیں بلکہ پورے سماج کی حرمت پامال ہوئی۔

ان کا کہنا تھا کہ اس سے قبل ہماری جانب سے ماضی میں نواز شریف پر جوتا اچھالنے، خواجہ آصف پر سیاہی پھینکنے اور احسن اقبال کو گولی مارنے جیسے واقعات کی بھی مذمت کی گئی تھی، انہوں نے کہا کہ علیمہ خان کے ساتھ پیش آنے والا واقعہ بھی افوسناک اور قابل مذمت ہے۔

 واضح رہے کہ گزشتہ روز اڈیالہ جیل کے باہر پریس کانفرنس کے دوران عمران خان کی بہن علیمہ خان پر انڈہ پھینکنے کا واقعہ پیش آیا تھا۔
پولیس کی جانب سے انڈہ پھینکے والی دو خواتین کو گرفتار کر لیا گیا ہے۔

پولیس نے انکشاف کیا ہے کہ علیمہ خان پر انڈا پھینکنے والی خواتین کا تعلق پاکستان تحریک انصاف (پی ٹی آئی) سے ہے۔