پرنس رحیم الحسینی آغا خان کا گلگت بلتستان اور چترال کا تین روزہ دورہ مکمل کر واپس روانہ

گلگت: اسماعیلی کمیونٹی کے روحانی پیشوا پرنس رحیم الحسینی آغا خان گلگت بلتستان اور چترال کا تین روزہ تاریخی دورہ مکمل کرنے کے بعد آج گلگت سے روانہ ہوگئے۔

تفصیلات کے مطابق دورے کے دوران انہوں نے ہنزہ، گوجال، گاہکوچ، غذر، گلگت اور چترال میں مختلف مذہبی اور سماجی تقریبات میں شرکت کی۔ ان تقریبات میں لاکھوں عقیدت مند شریک ہوئے اور اپنے روحانی پیشوا کے دیدار کی سعادت حاصل کی۔

تین روزہ دورے کے دوران گلگت بلتستان بھر میں خوشی، عقیدت اور جوش و خروش کی فضا دیکھنے میں آئی جبکہ مذہبی یکجہتی کا عظیم مظاہرہ بھی کیا گیا۔ مختلف علاقوں میں عوام کی بڑی تعداد اپنے روحانی پیشوا کے استقبال اور دیدار کے لیے موجود رہی۔

دورے کے اختتام پر گلگت کے ہیلی پیڈ پر پرنس رحیم الحسینی آغا خان کو باوقار انداز میں الوداع کیا گیا۔ اس موقع پر نگران وزیراعلیٰ، گورنر اور دیگر اعلیٰ عسکری و سول حکام بھی موجود تھے۔

گلگت سے روانگی کے موقع پر پرنس رحیم الحسینی آغا خان نے عسکری اور سول اداروں کا شکریہ ادا کیا اور سیکیورٹی سمیت دیگر انتظامات کو سراہتے ہوئے دورے کے دوران فراہم کی جانے والی سہولیات پر اظہار تشکر کیا۔