خراٹوں سے تنگ آکر بھتیجے نے چچا کو زہر دے دیا،مقدمہ درج 

جاپان میں خراٹوں کی وجہ سے تنگ آکر بھتیجے نے اپنے چچا کو زہر دے دیا،پولیس نے واقعہ کا مقدمہ درج کرکے نوعمر بھتیجے کو گرفتار کر لیا۔

غیر ملکی خبر ایجنسی کی رپورٹ کے مطابق جاپان میں ایک غیر معمولی واقعہ پیش آیا جس  میں 18 سالہ لڑکے نے اپنے چچا کو شدید خراٹے لینے کی وجہ سے زہر دے دیاجس کے نتیجے میں وہ اچانک بے ہوش ہوگئے اور ان کی حالت تشویشناک ہوگئی، لیکن خوش قسمتی سے چچا کی جان بچ گئی۔

تاہم دوسری جانب پولیس نے کارروائی کرتے ہوئے نوجوان کو گرفتار کرلیا گیا ہے اور اس کے خلاف قتل کی کوشش کے تحت مقدمہ درج کر لیا گیا ہے۔

تحقیقات کے دوران پولیس کو دیے گئے بیان میں ملزم نے اعتراف کیا کہ وہ چچا کے تیز خراٹوں سے کئی دنوں سے شدید ذہنی دباؤ کا شکار تھا اور برداشت سے باہر ہونے پر اس نے یہ انتہائی قدم اٹھایا۔

اس حوالے سے ماہرین نفسیات کا کہنا ہے کہ یہ کیس اس بات کی علامت ہے کہ چھوٹی چھوٹی باتیں بھی ذہنی دباؤ اور غصے کی صورت میں خطرناک نتائج اختیار کر سکتی ہیں۔