یوم دفاع پاکستانی عوام میں ایک نیا جذبہ اورجان وطن پر قربان کرنے کا حوصلہ پیدا کرتی ہے،علی امین

پشاور:  وزیراعلیٰ خیبرپختونخوا علی امین خان گنڈاپور نے کہا ہے کہ 6ستمبر کی یاد پاکستانی عوام میں ایک نیا جذبہ اور اپنی جان وطن پر قربان کرنے کا حوصلہ پیدا کرتی ہے۔

تفصیلات کے مطابق یومِ دفاع 6 ستمبر کے موقع پر وزیراعلیٰ خیبرپختونخوا علی امین خان گنڈاپور نے اپنے پیغام میں کہا ہے کہ 1965 کا دن پاکستانی قوم کے لیے ایک تاریخی دن ہے جس نے پوری دنیا پر یہ ثابت کر دیا کہ پاک فوج اور قوم وطن کی سلامتی کے لیے کسی بھی حد تک جا سکتے ہیں۔

اپنے بیان میں انہوں نے کہا کہ اس دن کی یاد پاکستانی عوام میں ایک نیا جذبہ اور اپنی جان وطن پر قربان کرنے کا حوصلہ پیدا کرتی ہے، وطن کے دفاع میں سکیورٹی اداروں نے جس جرات اور ہمت کا مظاہرہ کیا وہ ہمیشہ یاد رکھا جائے گا۔

علی امین گنڈا پور نےمزید کہا ہے کہ اس وقت ملک کو داخلی، خارجی اور مالی بحرانوں سے نکالنے کے لیے ایک آزادانہ حکمت عملی اپنانے کی ضرورت ہے، ہمیں تمام تر امتیازات اور ذاتی مفادات سے بالاتر ہو کر ملک و قوم کی بقا و سلامتی کے لیے یکجا ہونا چاہیے۔

علی امین گنڈاپور نے مزید کہا ہے کہ دنیا مسئلہ کشمیر کو آسان نہ لے بلکہ انسانی حقوق کے بین الاقوامی ادارے اس کی نزاکت اور حساسیت کو سمجھیں، انہوں نے معرکہ حق کے دوران شہید ہونے والے جوانوں کو خراجِ عقیدت بھی پیش کیا