پنجاب سے گندم کی ترسیل بند، خیبرپختونخوا میں غذائی قلت کا خدشہ: فلور ملز ایسوسی ایشن

پاکستان فلور ملز ایسوسی ایشن نے خبردار کیا ہے کہ پنجاب حکومت خیبرپختونخوا کو گندم کی ترسیل کی اجازت نہیں دے رہی، جس کے باعث صوبے میں غذائی قلت پیدا ہونے کا خدشہ ہے۔

ایسوسی ایشن کے مطابق خیبرپختونخوا کی فلور ملز پنجاب اور سندھ سے گندم حاصل کرتی ہیں، اور ان ملز نے گندم ڈیلرز و کاشتکاروں کو ادائیگیاں بھی کر دی ہیں، لیکن ترسیل میں رکاوٹ کے باعث اب انہیں بھاری مالی نقصان کا سامنا ہے۔

ادارے نے متنبہ کیا کہ اس رکاوٹ سے گندم کی ترسیل سے وابستہ ہزاروں مزدور بھی بے روزگار ہو سکتے ہیں۔ فلور ملز ایسوسی ایشن کا کہنا ہے کہ حالیہ سیلاب سے گندم اور چاول کی فصلوں کو شدید نقصان پہنچا ہے، جس کے بعد گندم کی بلاتعطل فراہمی مزید اہم ہو گئی ہے۔

ایسوسی ایشن نے وفاقی حکومت سے مطالبہ کیا ہے کہ وہ فوری طور پر خیبرپختونخوا کی فلور ملز کو گندم کی فراہمی کا مسئلہ حل کرے تاکہ بحران سے بچا جا سکے۔