پنجاب میں اسکول ٹیچر انٹرنز کی دوبارہ بھرتی کا فیصلہ

پنجاب بھر کے سرکاری اسکولوں میں اسکول ٹیچر انٹرنز (ایس ٹی آئیز) کی دوبارہ بھرتی کا فیصلہ کر لیا گیا ہے۔ اس سلسلے میں بھرتی کی سمری وزیر اعلیٰ پنجاب کو ارسال کر دی گئی ہے، جس کی منظوری کے بعد عملدرآمد شروع ہوگا۔

ذرائع کے مطابق صوبے کے مختلف اسکولوں میں تعینات تقریباً 12,500 ایس ٹی آئیز اپنے کنٹریکٹس میں توسیع کے منتظر ہیں۔ واضح رہے کہ ان اساتذہ کے معاہدے گرمیوں کی تعطیلات کے آغاز پر ختم کر دیے گئے تھے اور چھٹیوں کے بعد تاحال ان میں توسیع نہیں کی گئی۔

متاثرہ انٹرنز کا کہنا ہے کہ ان سے اڑھائی ماہ تک تدریسی خدمات لی گئیں، مگر بعدازاں صرف تنخواہ اور تجربے کے سرٹیفیکیٹ دے کر فارغ کر دیا گیا۔

محکمہ تعلیم کے حکام کے مطابق اسکول ٹیچر انٹرنز کی بحالی اور کنٹریکٹس میں توسیع وزیر اعلیٰ پنجاب کی منظوری سے مشروط ہے، جس کے بعد دوبارہ تعیناتی کا عمل شروع کر دیا جائے گا۔